購物研究

認識一種人，以為他喜愛購物，其實不，正確說法應是──他喜歡「購物研究」。

即係，不停研究各牌子各型號的數碼相機，來一個功能大比併、價錢大對照，問過數十位朋友，上過數十個消費網站，取了數十張宣傳單張，甚至速成學會了一大堆反駁的理由，即如，A君講Nikon邊款好，他會反駁數十種Nikon的毛病，B君講Canon那款正，他又懂反駁數十種Canon的毛病，總之，研究研究，對話對話，反駁反駁，到最後，我發現他原來沒有添置一部數碼相機的動機，純為講下講下，繼續研究研究。

這種人，通常都對數碼相機、電腦、電器這種科技產品別具興趣，有時，也會指涉到其他範疇，例如名牌手裝、時裝、家具、股票甚或其他如文化等。

研究好，研究往往會產生新知識，但作為一個朋友，不時被他的「研究態度」問到火起，即係，我會話如果我要買就揀像數大、熒幕闊、價錢平的，他會即時質疑你點解唔理耗電量、過熱危險及叉電麻煩，咁我又話，咁我唔覺得有太大問題啊，他又會話，車，乜你都唔識架。

總之，我答不到他心目中的牌子與型號，他就不悅。

911之後很多人講珍惜，而我，較扮野，喜歡講當下，即不堪回首不喜展望，只想生活充實有趣選擇多一點，即係，我要買相機，我情願到百老匯摸他十部、八部，見順眼，就買；又即係，我買時裝，走入店舖，摸摸摸，試試試，著順眼，又買，鬼理佢月下高貴新款還是貨尾野。

經過近一年的研究期，最近我始發現我那位「研究部」的同事終於買了數碼相機，唔知點解，一買就兩部，一部Sony，一部Panasonic。